Timable

其實毒L一個打邊爐更開心 — 「逼科」毒L火鍋大比拼

author: Timable, 14 Dec 2015 (Mon) 7:02pm


今個星期氣溫驟降,夜晚食咩好?梗係烚下烚下暖笠笠最開心啦!之但係,打邊爐呢家嘢,一樓都係多人性活動。臨時臨急Call friends出來打,唔係話要拍拖就話阿媽煲咗湯,唔通連詩雅都唔鍾意我呀?唔通單身毒L真一條原罪?唔怕喎!由於小編乃一個不節不扣但又自得其樂嘅慢性毒L,當然有好嘢益大家啦!今次揀來毒L邊爐(即一人火鍋)界嘅「逼科」(Big Four)大比拼,分別有大家X、大快X、吉野X美X,詳細逐項比拼,等各位可以毒自打邊爐都可以食得醒過人!

正所謂「逼科」呢家嘢係人哋叫嘅,唔似得某樂壇組合走去自稱嘅。今次揀嘅「逼科」,係基於小編印象中大家X是4間之中好多年前首間引入毒L邊爐嘅(如有錯,講指正)。而小編幾年前仲開咗個冇人like嘅unofficial FB fan page講大家X毒L邊爐;之後吉野X將之發揚光大普及化;至於另外2間,因為佢哋都多分店吧,總有一間喺左近,方便大家選擇。如果民間各區有其他小店臥虎藏龍賣毒L邊爐,請提供資料,但今次大比拚都係比較返大家就腳嘅「逼科」,等大家一條友一時之間邊爐癮起都可以快快手搵到間救火。

比拼分幾個方面,有湯底、牛肉、配料、火喉、飲品等等,由於個個Menu唔同,而次次出品嘅品質都會有啲出入,所以只能做到盡量公平。當然,食評呢家嘢梗係有主觀成份啦,讀者可以自行判斷喔。但可以肯定嘅係,呢篇絕無廣告成份喔~唔好講咁多,開爐!

Round 1 - 湯底
大家X: 豬骨濃湯 / 番茄薯仔湯 / 沙爹湯
大快X: 胡椒咸菜湯 / 番茄薯仔湯 / 惹味麻辣湯
吉野X: 日式濃湯 / 野菜清湯 / 咖哩湯
美X: 日之清菜湯 / 日之醬油湯 / 日之味濃湯
(每間第一個為小編所選之湯底)

選擇方面以大快X較為吸引,是唯一一間提供麻辣的,不過小編選了胡椒咸菜湯因為好似幾特別,都幾有胡椒咸菜味。另推介吉野X嘅日式濃湯,很有日式すき焼き嘅味道!但除咗湯底本身,有樣嘢是必定會做而又好緊要的—加水!呢樣嘢,吉野X最細心,3隻湯底有3壺唔同湯底比你自己加,唔怕溝淡原先個味,值得一讚!其餘的都是清一色同一壺水/湯,加加下就好似拍左拖十年嘅男女朋友咁,淡晒lu~所以呢一Round嘅得分係

大家X: 5 | 大快X: 8 | 吉野X: 7 | 美X: 5

大快X


==================================

Round 2 - 牛肉
眾所9知,牛肉好毒,而且又是邊爐主角,所以最啱毒L打邊爐食。其實4間一般都有豬/雞比啲冇咁毒嘅人揀,不過小編為求公平,都一致揀牛,實行由頭毒到落尾,搞到小編為咗寫呢篇文仲毒過之前。至於是咪所謂嘅穀飼牛就算吧啦,都唔多食得出嫁啦,主要係睇多唔多白色嘅肥膏啦。就小編食嘅嚟講,大快X較少肥膏,又卷到一圈圈好似以前去那間勁貴嘅強國小肥X一樣咁醒神。至於大家X同吉野X就用一個膠盒封埋保鮮紙好似好衛生咁雖則唔環保。講味道就,老老豆豆,都係嗰句,幾廿蚊,比和牛你食咩,都係但求肉有肉味滾十秒食得就可以啦。得分係

大家X: 6 | 大快X: 8 | 吉野X: 6 | 美X: 5

==================================

Round 3 - 配料
配料即係牛肉以外用來滾嘅材料,一般係丸類、海鮮、豆腐同菜。呢樣大家X較出色,有炸魚皮,又有鮮肉丸,海鮮有隻帆立貝、蝦同多咗2嚿魚,加$5仲有個魚滑,呢個必加!吉野X大家都食慣了,都是蟹柳、豆腐、南瓜、大白菜等,而主角是那嚿芝士竹輪,好食但要小心入面啲熱芝士爆出來燙親個咀仔;整體就同美X差唔多,冇大大棵生菜比你滾,比較日式。大快X唔包菜以外嘅配料,要另外加錢。得分係

大家X: 8 | 大快X: 5 | 吉野X: 6 | 美X: 6

大家X


==================================

Round 4 - 爐火
食神滔滔易Fat 喺廣告入面都話打邊爐最緊要唔係啲料,係個爐呀!記得好多年前大家X打邊爐嗰時個火只係一點火,等成世煲湯都唔滾,但就等到自己火滾!多年後而家個火已經進化成3點式火,快滾咗好多;個爐火就其實4間都差唔多,但當中小編去吉野X嗰間新裝修嘅分店竟然係用電.磁.爐!嗚呀~仲要係嵌咗入張枱入面的!唔講仲以為上手漏咗部iPad冇攞走添呀...火力之猛,前所未有,可校大細,十分爽皮,唔捨得走,好想過對面百X買嘢加料喪打~不過邊間有電磁爐就等你哋自己發掘喇,除非佢比廣告費我啦~得分係

大家X: 6 | 大快X: 6 | 吉野X: 8 | 美X: 6

吉野X


==================================

Round 5 - 飲品
打邊爐實會口渴,尤其係食辣嘢,以前年代邊爐跟嗰杯嘢飲同平時食叉飯嗰杯嘢大細冇分別,咁又點會夠喉呢~而家進化咗了,跟邊爐的嘢飲通常係重量級,大杯咗好多,都夠救下火!但一般都要加錢先有,得吉野X唔駛加錢都有。不過加錢先有嘢飲有好有唔好,好嘅當然就係抵啲唔駛比多幾蚊,唔好嘅就係如果唔包嘢飲,毒L們就可以過對面7仔買返罐啤啤啤佢!唔敢?未試過?好明顯你唔夠小編毒啦~放心喎,小編飲咁多次都冇人話嫁喎~咪話我話醒你~至於唯一一間有得吃麻辣嘅大快X就反而冇嘢飲送又冇加大裝降火飲品,要扣你分喔~得分係

大家X: 6 | 大快X: 5 | 吉野X: 7 | 美X: 6

美X


==================================

總分
大家X: 31
配料出色,值得一吃

大快X: 32
湯底不錯,點都要試

吉野X: 34
包埋嘢飲,識食之選

美X: 28
中規中矩,可以一試


總評
就咁啦,其實好唔好食,啱唔啱食,見人見智。不過,單身邊爐傷身呀~最好,快啲搵返個Partner同你一齊打邊爐啦~就算2個人又係食返呢4大毒L邊爐,嗌2份,個味道都會完全唔同晒嫁~唔信?試下啦!毒L們,共勉之,阿們!

後記
話說小編OK大食,俱俱一個一人火鍋又典夠禾頂一晚。於是,其實每一次小編食毒L火鍋前都會準備一包後備烏冬喺個毒L背囊入面,唔夠飽就拎出來滾埋佢,巧滿足豬。寫呢篇文那一次去吉野X,對面搭枱情侶的女友見小編拎包後備烏冬出來滾就同男友竊竊私語笑(8+1)小編(8-1),其實我聽到囉,下次再大聲啲吖~我心諗,你條仔又會夠飽啦,而佢明知唔夠飽又唔識做好準備或者當場再叫extra烏冬先係(8-1)啦~加個烏冬成$10~對面759 $10幾多包你知唔知呀~土地問題有幾嚴重你知唔知呀~Um...我諗...男人一生,除咗要尋覓一個肯同自己睇Clockenflap嘅女人,仲要尋覓一個肯同自己去吉野X打邊爐自備烏冬嘅女人囉~

文: 毒L美食專員 黑莓
related events

樓上芒果雪條集LIKE大行動

4 - 31 Jul 10am (10hr)

@ 全線樓上門市

【芒果專家發功 集LIKE換$1雪條?】 今個夏天,芒果專家為咗幫🐫(其實係佢自己😏)食到$1芒果雪條,將會召集埋各行各界嘅專家,不斷發功支持 詳情: http://bit.ly/2YuXnta 實際活動結束日期...

THE MARKET@HOUSE 1881

20 Jul - 25 Aug (every Sun, Sat) 11am (7hr)

@ 1881 公館

由7月20日至8月25日,一連六個週末,將會有各式精緻美食、特色藝術品攤位,同現場音樂薈萃於 THE MARKET,齊集食、視、聽三重享受,等你可以喺呢座百年英倫古蹟入面,同親友歡度週末時刻...

Pacific Coffee「山楂夏日清新特飲買一送一」

22 - 28 Jul 10am (8hr)

@ 香港全線Pacific Coffee

山楂夏日清新特飲買一送一! Pacific Coffee Instagram帳戶的Followers於7月22日(星期一)至7月28日(星期日)期間,上午10時至下午6時 來到分店,即可享與么鳳聯乘推出的凍山楂檸檬梳打、凍山楂...

more related events
last blog

浪漫二人行 - 愉景灣

1 Dec 2015 (Tue) 12:47pm

香港人無不厭倦都市生活,假期首選當然是去離島(偽旅行)自我安慰一番!今次會介紹一下愉景灣,讓大家感受下歐美渡假的感覺,不過臨近聖誕,單身者不宜前往!有另一半者,去完包保感...

next blog

AIA嘉年華「攤位遊戲攻略」

17 Dec 2015 (Thu) 4:54pm

一年一度AIA嘉年華又嚟啦!好多人都覺得貴,因為玩樣樣嘢都要俾錢,想玩最刺激個幾款機動遊戲,真係要成百蚊先玩到一次~ 但點解仲係咁多人會去呢?AIA比起香港主題樂園,又真係帶到多D...

comments