Timable

毛記,你玩L晒啦?! — 毛記電視《第一屆十大勁曲金曲分獎典禮》Rundown、分獎名單及短評

author: Timable, 12 Jan 2016 (Tue) 1:23pm


官方足本重播 http://www.tvmost.com.hk/2016_tenbig

由宣佈搞總選一刻開始,其實已經全城期待。林日A又十分透明地一路報告進度,當中提及所遇到嘅難題,包括要勁蝕一球先成事,於是有fans自掏荷包贊助以表支持,但集腋始終難以成「球」。其中一個高潮係正當Promo Materials就快要出街即係要confirm晒啲嘢之際,冠名贊助商Shell終於出現!不論有車冇車的人全都立即神化此Brand,視之為救世主 (有關Shell之石油爭議請睇沈旭暉fb),大家亦史無前例地由衷真心膠又毫不吝嗇地多謝一個「商業」活動嘅贊助商,為咗少少機會有飛,林生臉面一宣佈邊個油站有飛送(極少量),有車廢青立即9衝去油站加油加油。搶飛程度,近年少見,同Lady Gaga有得揮。


入到場,聽住偽.大台頒獎禮主題音樂,心情興奮。開場,毛記主播們出場跳舞,雷動嘅掌聲同觀呼聲勁過睇Eason,唔夠一年時間,幾位主播嘅知名度之高,是一個奇蹟。

逐首歌分獎,王宗堯同盤菜唱過之後第一個高潮來了,葉蘊儀唱《中女羅生門》,本身都真係唱得幾難聽下,但件事正,豪俾你,然後專家Dickson出場頂Juno個位,全場爆High,佢唱那段毒L自白亦係未出過街的,堅正!然後張氏兄弟唱《想搭很難》又是好正!全場一齊唱返《喜氣洋洋》畀小鳳姐聽又係經典!到何韻詩唱《明張目膽》更正,真係填得好抵死!好可惜陳奐仁嚟唔到又唔換人唱,但播出來的好似係再拍過?!好似長過之前?然後曲金曲獎,河國榮《亞視永恆》,鋪排咗大半年唔俾隻歌上Top 1 就係為咗呢個Moment,真係好正!(穿過咗王征,跨過咗嘅維基在台下) 佢話毛記好有愛,「愛」字都係鬼佬易開口啲。

最受歡迎組合係繁忙兒童合唱團,唱咗首Medley《Sir來了+測無驗+喇沙真的愛你+完咗暑假+補充練習無間做》,呢Part真One of the Best of Tonight,一班天真無邪嘅細佬唱出最諷刺嘅歌詞,好好笑得嚟眼淚不自覺地流到成面都係,其實就算俾「唔得掂」睇佢都唔會明,細佬版劉華型到裂,呢Part堅正!(睇呢度: http://goo.gl/s9KGXc | 伸延閱讀 「劉小華」媽咪祝所有小朋友「用自己方式認識世界」http://goo.gl/DZFq2z )


Gatsby《畀女飛正傳》的林海峰好可惜又冇到,否則會好爆。鵬哥唔駛試咪就直接唱《幾好相與》high爆!林雪Video在Now直播廣告時段喪爆粗好好笑。俞琤呢頭唔做商台嗰頭就來拎「大紫荊分獎」,由惜日後輩林日A頒俾前輩,意義重大,YT一段讀白亦語重深長,如果香港在位的都是咁樣諗年輕一代,香港就唔駛搞到而家咁。(伸延閱讀「林日A與俞琤」 http://goo.gl/NPlqmC )



hocc獲分「一台聯頒傳媒大獎」唱出新填的《廢鐵是怎樣煉成的》,方健儀得香港區最受歡迎女歌手獎在小鳳姐面前唱出新填的《婚姻背後》,而河國榮分得香港區最受歡迎男歌手獎唱《真.香港地》同原裝MC仁一齊Rap,全場真正高潮喪嗌一齊唱!(場內見盤菜邊睇邊狂抹眼淚) 三十年前買單程機票來港嘅鬼佬,話冇諗過上一次封面就會搞成咁,收到份詞好開心但又好擔心,因為要Rap,對個老外嚟講點都有啲難,但最後都完美地唱出,一個真.香港老外帶住大家唱「同熱愛這片土地 大家刻骨銘記 愁或喜 生與死 也是香港地」,滾動否?

改歌詞唔是第一日,當年嘅《鳩癮》響徹K房,幾年前小克改《一絲不掛》成《一支得掛》Eason親自唱過Live,高登亦不嬲有改開,即改詞不是新鮮事。但林總將之昇華,靠堅持同快。堅持者,一星期改十首,風雨不改,首首貼近民意。快者,星期一臨出街有新Topic會抽起舊嘢即作即出。當然,齋堅持同快係唔夠,仲要夠認真同絕核。認真者,「認真事柒做,柒事認真做」。絕核者,才華、觸覺、創意是也。

自從黃子華轉戰紅館,估唔到能夠再喺伊館拍爛手掌同喪叫。一開場東方昇嗌「點人數」同分咗2999個獎俾在場每一位觀眾,而場刊亦是一個獎座形狀,人人有獎,足見其創意同用心。唔止笑,其實眼淚同樣多。邊睇邊想,呢件事好香港,我唔覺有其他地方可以喺大半年內,由零變成一件咁爆嘅事,如果在一個太平盛世,基本上冇可能,就係個咁膠咁荒謬咁痴L線嘅社會先會有無限Topics去成就呢件事,說來諷刺,又是事實。台上沒有人感謝建制、689、共產黨,當然也不應感謝,但確實冇佢哋就冇毛記呢件事亦冇呢個Show。如果問林日A,我估佢答寧願冇。

前文說過,毛記的「顛覆/破壞性創新」Disruptive Innovation的確厲害(伸延閱讀 毛記電視《勁曲金曲》幕後黑面 — 林日曦 http://timable.com/blog/995278 ),而家有邊個Media唔係跟住佢哋走?作為行內人,其實對毛記又愛又恨。愛者,每次佢哋都有佳作,而且都好令人五體投地,你不難聽到行內人(即Online/Social Media、廣告公司同Agency等)常常寫個「服」字畀佢哋。恨者,一來難追;二來,就算我哋肯追,啲Kai人(亦即Client) 都唔會肯追,香港啲Kai人仲停留喺電視(大台)同紙媒(詳細請閱Rudi Leung廣告風涼話 Facebook page)嘅年代,我肯度埋橋draft埋Sell埋畀你,你到頭來叫我一字不漏照出你的娘屎官腔Copywriting?!OK!我費事同你拗照出,之後你問我點解冇人Like?咁趣緻嘅?!難道你認為你啲娘屎官腔Copywriting會引來Gatsby同Shell 嘅反應?你可能唔知呢2個Cases,或者係你高層/高高層唔知啫。當然,毛記初時都遇到呢個問題,但憑住佢哋嘅堅忍同毅力,終於打破咗缺口,藉著Gatsby同Shell 呢2個Cases希望可以Disrupt埋Kai人界,跟返個地球轉,接受新嘢,不再固步自封。

全晚洗版,洗到第2朝都仲未洗完。中學教師朋友傳來Whatsapp說佢仲有1/3班學生仍然不知毛記為何物,繼續溝女波鞋打機。跳出來看,我們這班毛記死忠不應自我中心地認為毛記已經是好大好大,而再搞笑的嬉笑怒罵亦其實未能即時改變荒謬嘅議會同體制。我問林日A「你在消費政治嗎?」佢答「我提供一對門,等你自己去打開然後發掘。」鍾樹根區選落馬,你敢講完全唔關首《明張目膽》事嗎?繼續唱《鼠能夠》能否為香港滅鼠?河國榮得獎時說「試可能會失敗,唔試就一定失敗。」老土但永恆地啱。全晚除了Shell是大贏家,在場內/場外的每一位觀眾都是贏家。多謝毛記,請繼續玩L晒,下年紅館見!


PS 1. 冇咗第一代主播o趙海珠
PS 2. 仲有2首真.滄海遺珠:《會過海的》真.車婉婉 同 《發達號》真.RubberBand

毛記電視《第一屆十大勁曲金曲分獎典禮》Rundown及分獎名單

開場
《Dance歌之王》眾偽員

十大勁曲金曲
10/ 《終身習武》真.鄭融 (冇嚟)
9/ 《胸追人》真.王宗堯
8/ 《越癌越愛》盤菜瑩子
7/ 《中女羅生門》真.葉蘊儀 feat. Dickson
6/ 《想搭很難》真.張崇基、張崇德

NOWTV廣告時間
《鼠能夠+耶穌到》梁靚芬合唱團唱

5/ 《羞家BABY》FF的s
4/ 《中東與綜》真.方健儀
3/ 《明張目膽》真.何韻詩
2/《 北韓海闊天空》真.陳奐仁 (冇嚟)
1/ 《亞視永恆》真.河國榮

NOWTV廣告時間
男女歌手最後五強片段

香港區最受歡迎組合
《Sir來了+測無驗+喇沙真的愛你+完咗暑假+補充練習無間做》繁忙兒童合唱團

最受Gatsby歡迎廣告歌曲大獎
《畀女飛正傳》林海峰 (冇嚟)

最受Shell歡迎廣告歌曲大獎
《幾好相與》盧海鵬

NOWTV廣告時間
不得獎感受 | 林雪 (含大量粗口)

大紫荊分獎
俞琤

一台聯頒傳媒大獎
《廢鐵是怎樣煉成的》何韻詩

香港區最受歡迎女歌手
《婚姻背後》方健儀

香港區最受歡迎男歌手
《真.香港地》河國榮 feat. MC仁

報導: 黑莓
鳴謝毛記提供門票

圖片來源: 100毛fb、毛記電視fb、Facebook #多謝Shell、NOWTV Cap圖
related events

毛記電視《第一屆十大勁曲金曲分獎典禮》

11 Jan 2016 (Mon) 8pm (3hr)

@ Arena, Queen Elizabeth Stadium

毛記電視強行主辦,Shell Bonus咭冠名加油: 0競爭,0黑幕,0公信力! 一晚分發超過三千個獎項! 人類史上最大張樂壇成績表! 毛記電視第一屆十大勁曲金曲分獎典禮 一月十一 真.伊館 分獎...

林日曦《細聲講___》

11 - 19 Dec 8pm (2hr 30min)

@ Macpherson Stadium

Update 7/7/2019: 公佈咗確實日期同第二輪優先訂票 Update 19/4/2019: 腦細確定12月麥花臣~ 林日曦 Facebook // 《林日曦細聲講___》(名都未有) 主辦機構:毛記電視廣播有限公

The 1975 Live in Hong Kong 2019

8 Sep (Sun) 8pm (2hr 30min)

@ Hall 2, AsiaWorld-Expo

Big Winners of 2019 Brit Awards, the 1975, have just taken home two significant awards for “Best British Group” and “Album of

郭富城《舞林密碼》世界巡迴演唱會 2019 香港站

1 - 15 Dec

@ Hong Kong Coliseum

Update 18/2/2019: 消息指城城成功得到12月紅館檔期,而如果Eason又真係拎到跨年檔期嘅話,咁就即係2個天王,一個12月上半,一個下半啦! 郭富城(城城)呢個《舞林密碼》tour本身喺2016年已經做咗...

more related events
last blog

玩樂停不了 [1月號]

29 Dec 2015 (Tue) 3:42pm

玩樂停不了 - 一月號 重點推介: 一系列寵物嘉年華及戶外活動 玩足一個聖誕,大家應該都食到肥咗DD咁多~係時候去戶外走動吓,清走脂肪喇~有寵物嘅你,有幾耐冇帶佢哋去蒲?今個月正好有...

next blog

請人寫嘢

15 Jan 2016 (Fri) 3:45pm

Title: Editor / Writer / 你想叫咩吖 (Full Time Mode) Freelance Writer另議 Duties: — 寫文 / Edit 文 — 出街搵料 — Facebook / IG 出Post 及 管理 — 管理Freelance Writers Requirements: — 識寫字 — 一個月睇30本書 — ...

comments