Timable

【市區 x 山景】秋日行山輕鬆遊

author: Timable, 18 Nov 2016 (Fri) 3:53pm


終於涼喇!終於涼喇!被fake咗無限次嘅小T喺呢個星期終於真係feel到涼意,希望今次個冷鋒可以留得耐啲啦…BTW,天氣一涼條行山癮就出晒嚟,小T幫大家搵咗幾條又有得睇市區景色,又可以親親大自然嘅行山路線,睇下醫唔醫到你條癮?

港島區-紅香爐峰(難度★★)

路線簡介:
全長:7.5 公里
需時:2.5 小時
起點:畢拉山道
終點:鰂魚涌


由畢拉山道出發,經過爆炸品處理基地入口之後,沿住金督池馬徑一直向前行,冇幾耐就會見到左方遠處有座頂部有標柱嘅小山,正正就係紅香爐峰喇!喺呢度可以遠眺銅鑼灣、中環同九龍一帶,亦都係影呃like相嘅最好位置!不過注意返:上呢個紅香爐峰係需要少量嘅攀爬,記住小心安全呀!
之後可以沿住金督池馬徑行,中途會有路徑落返寶馬山道。如果想繼續上寶馬山,就可以往寶聯徑方向行,見到分岔口向右走,就會見到登上寶馬山嘅樓梯㗎喇!小徑前方亦都有條落山樓梯,走嘅時候沿住佢行就可以去到鰂魚涌。

九龍區-魔鬼山(難度★★)

路線簡介:
全長:3.5 公里
需時:1.5 小時
起點:油塘
終點:高超道


喺油塘港鐵站出發,去到鯉魚門徑之後,再向天后廟方向行。天后廟左邊就係衛奕信徑,有樓梯可以一直上,上到去將軍澳華人永遠墳場嘅車道。之後沿住右邊嘅分岔口行就會去到歌賦炮台㗎喇!
跟住又可以落返衛奕信徑,按炮台山嘅路牌指示右轉上山,前面左方會有條樓梯可以上到去炮台山山頂嘅碉堡,又係另一個影相位!走嘅時候只要去返衛奕信徑,遇分支後左轉就可以去返高超道。

新界區—青衣三支香

路線簡介:
全長:4 公里
需時:2.5 小時
起點:青康路
終點:青康路


嗱唔好畀個名嚇親先!其實係因為呢座山有三個山峰,遠睇好似三支香咁先會咁命名。喺青康路巴士站往美景花園側嘅行人徑一直向前行,直至見到右手邊有樓梯就向上行到去一個大平台。之後會經過涼亭同墳地,喺分支位左轉直走就會經過第一支香,第二支同第三支香!
呢個貨櫃碼頭景真係好少有,大家做好瘋狂影相嘅準備喇!走嘅時候都好簡單,只需要原路折返就可以喇。

最後小T提提大家,無論行咩山都好,都記住要注意自己安全,同埋帶返走隨行嘅垃圾,齊齊保護香港嘅大自然呀!
related events

「e-Planet夢想星球 」光影互動展

5 - 31 Jul 10am (8hr)

@ 香港挪亞方舟

馬灣的挪亞方舟增設的全港首個以大自然為主題的光影互動展館「e-Planet夢想星球」正式開幕,館內四個以森林、海洋、四季及未來城市為主題的光影展區結合藝術與科技,以嶄

more related events
last blog

【心思取勝!】聖誕手作禮物推介

17 Nov 2016 (Thu) 12:22pm

仲有一個月多啲就到聖誕節喇!根據非正式統計,最多人揀嘅聖誕禮物通常都係頸巾、銀包……呢啲大路到唔大路嘅嘢。想用心思取勝,贏女神又或者係男神個心返嚟?嗱咪話小T唔益你哋喇...

next blog

《明.日.之.前 Before Tomorrow》訪問GDJYB 雞蛋蒸肉餅

25 Nov 2016 (Fri) 10:30am

如果有人跟你講「雞蛋蒸肉餅」,一般人的反應是「一味餸囉!」然後停兩秒再follow up「唔係喎,平時食開嘅係咸蛋蒸肉餅至真!」的確,「雞蛋蒸肉餅」是非主流的,說的不止是食物,還有...

comments