Timable

【家居風水2020】 簡易佈局催旺財運、桃花人緣

author: Timable, 21 Jan (Tue) 11:33am


年廿八,除咗洗邋遢之外,都可以試下喺屋企用簡單擺設,催旺來年運勢。以下就有六個風水佈局介紹比大家,包括催桃花人緣局、催財局、催文昌考試局、催生意局等等。不過風水佈局只係適合獨立使用,如果唔係,就有可能會出現互相抵銷嘅效果。

催桃花人緣局:一杯水+音樂盒
今年桃花位喺東北,太歲三合位喺西南、東南。

喺屋企東北位放一杯水加音樂盒可以催旺桃花。如果想加強埋人緣,就再放一個龍形擺設喺東南、一個猴形擺設喺西南。擺齊哂就又有桃花又有人緣啦!人緣同桃花有小小唔同,如果你只係想要人緣,咁東北位就唔洗放音樂盒。

桃花位係引入人緣,聚貴氣人脈嘅地方,一定要保持整潔同明亮。如果你屋企嘅桃花位唔夠明亮,就可以放一盞燈幫助改善運程。

催財局:白水晶柱
今年喜慶位喺正西,七赤位喺中宮,財位喺西北。

想催財,喺財位擺一枝白水晶柱就搞掂啦。再簡單啲嘅佈局方法,就可以喺以上三個方位各擺一杯水,重點係加一粒黑石入水中。不過呢個催財局唔適宜長期使用,記得每三個月就要停用一個月,之後先再擺過,如果唔係就會無效啦。

財位最忌泄財氣!如果屋企嘅西北位咁啱有缺角,或者有門窗,就要喺缺角位擺放一件泰山石擺件,或者喺門窗位擺一尊貔貅幫助化解。

催生意局:富貴竹
今年白桃花星喺東北方,四綠文昌星喺西南方,六白橫財星喺東南方。

做生意嘅你,如果想多啲訂單同生意,喺東北方放一杯水或者一枝玫瑰花,西南文昌位放四枝富貴竹,或者用一個筆筒放四枝毛筆代替。而東南方放六粒白色石頭加一杯水,都有助達到催旺生意,賺到佣金嘅效果。

要財位得以發揮,注意擺放物件嘅位置唔好有橫樑,唔好受到壓制。

催文昌考試局:四枝毛筆
文曲星又叫四綠文昌位,今年嘅文昌位喺西南方。

各位父母可以準備四枝毛筆,安放喺小朋友嘅書枱。擺放毛筆係有助增強四綠嘅氣息磁場,令人文才出眾。除咗毛筆,好多人都會買座文昌塔擺設喺文昌位,注意文昌塔最好由天然材質雕刻而成,例如玉石或桃木,而文昌塔擺放位置亦唔應該對住廁所或者廚房門。

文昌位喜靜,記得書枱要保持整潔,唔好堆放雜物,避免影響學業或者事業心,不利進步。

催健康 化病局:灰色/白色地氈
今年正東係大病位,亦係最兇嘅方位。

如果開門、開窗、座位、臥床、爐灶位都係正東方嘅屋企,就要特別小心。建議喺正東位用灰色或白色地氈,地氈下面可擺放金屬物件,例如五帝錢。注意正東位不宜擺放紅色或者黃色物品。亦都可以喺門內掛上掛鈴,或者喺大門內旁邊放音樂盒,有助化解病痛。

催旺人緣 化是非局:紅色地毯
今年東北桃花位,正北係爭鬥位。

「正北方」係受「三碧是非」星所影響。想化解成日被人篤背脊講是非、遭人誹謗,什至犯官非等等麻煩事。就喺北方嘅門口位放一張紅色地毯,或者點起一盞紅燈。再簡單啲,喺座位背後貼張紅色三角形紙,都有助趕走是非小人!

另外,喺東北桃花位放一杯水、正北爭鬥位放粉紅色物件,都幫助到旺人緣,化是非。

撰文:Zoe
related events

DIY水喉班

8 Aug (Sat) 10am (7hr)

@ 裝修學院

「DIY水喉班」四大重點內容: 1. 認識一般住宅供水系統及維修責任 2. 常見住宅漏水情況分享及處理方法 3. 水渠淤塞:水喉保養及通渠方法 4. 防水滲漏:防水物料分類及維修方法 「DIY水喉班...

農曆年初四 2021

15 Feb 2021 (Mon)

@ Hong Kong

由於2021年的農曆年初三為星期日,故農曆年初四將被訂為公眾假期。

農曆年初一 2021

12 Feb 2021 (Fri)

@ Hong Kong

喜迎新年,來香港感受濃濃正港年味!在「香港新春節慶」期間,您可以欣賞國際時尚的花車巡遊、璀璨炫目的維港煙花、緊張刺激的賀歲賽馬;投身傳統喜氣的春節花巿、特色道地的許願節...

more related events
last blog

【辦公室風水2020】 打工仔必備佈局攻略

20 Jan (Mon) 5:16pm

臨近鼠年,大家都想來年順風順水,無論係老闆定係打工仔,都想財源廣望、人緣暢旺。而辦公室係工作搵錢嘅地方,擺得啱分分鐘做嘢事半功倍,即睇鼠年辦公室方位催旺法! 背有靠山 打...

next blog

[農曆新年期間] 各區開診醫生姓名/時間/電話

23 Jan (Thu) 3:54pm

農曆新年期間指24~31/1/2020 請先致電診所預約。 如需其他協助,可於辦公時間致電2527 8285醫學會秘書處。 分享畀親友保平安! 祝大家鼠年龍馬精神! 香港區 中西區 http://www.hkma.org/medilink/hkhome...

comments