Timable

率先試玩: 海洋公園哈囉喂 2015

author: Timable, 24 Sep 2015 (Thu) 12:20pm


還記得當天小編第一次玩Halloween, 唔是在海洋公園, 亦唔是在廸士尼, 而是在大學的Hall裡。我所住的Hall, 樓高5層, 每層有唔同主題, 有中式有西式, 中式者滿地溪錢, 紙紮公仔當然唔少得;西式者較為可愛, 不外乎蜘蛛、蝙蝠、南瓜等, 比較勁的是有位”敗痾”系同學拿來骷髏朋一副, 算是高成本製作。

而家人大咗, 冇得喺Hall玩就要去主題公園玩啦! 兩個去邊個好? 相信大家都係記得羅蘭姐多啲啦~ 這就是Marketing的威力! 今年係海洋公園哈囉喂15週年, 聽講有「8間鬼屋, 10種體驗」, 咁多間究竟一次過玩唔玩得晒呢? 而今年嘅鬼屋又有幾驚嚇呢? 等小編捨身為人民, 率先試玩! (驚驚豬mode)

今年哈囉喂嘅一大重點, 就係同FOX頻道全球熱播《陰屍路 The Walking Dead》合作嘅「逃出陰屍路」鬼屋。套劇之前大家都應該睇過, 就算未睇過都大概估到套劇係講啲主角們係咁跑呀跑呀跑, 又係咁殺啲喪屍, 但當然, 美劇好睇在會有好多錯中複雜曲折離奇千絲萬縷嘅鬥智鬥力, 喺睇就嚟播嘅Season 6之前, 可以率先玩呢間重現一幕幕過往幾季經典恐怖場景嘅鬼屋, 又真係好刺激喎! 親身去到詭秘嘅小鎮監獄同終點站等劇集內唔同場景, 要面對啲扮得真係好恐怖加核突嘅喪屍嘅凶猛突襲, 直頭好似代入咗套劇一樣咁緊張!


小編同新一代人氣美少女模特兒Jody 曾雨晴一齊走入呢間喪屍鬼屋, 未見喪屍已經畀陰深嘅場景同氣氛嚇到個心離咗幾離! 突然就走咗2隻好爛晒面嘅喪屍出來, 唔知典解明明知佢係假嘅, 都真係會驚! Jody驚驚豬就更好, 小編可以安慰佢一番~ 走過幾個場景, 救星到喇! 原來演員們連警察都扮埋, 負責保護市民! 小編即時唔驚豬, 仲頓時感動豬! 感慨原來警察及其手臂嘅伸延唔係用來打市民架! 係用來打喪屍架! 正當小編都未感動完, 就有7個警察將隻喪屍推咗埋暗角, 拳打腳踢咗成2分鐘呀! 嗚~ 嗚~ 雖則我唔是條喪屍肚入面條屍蟲, 我都戥條喪屍痛呀~ (當然, 呢幕是老作的) 好不容易, 在驚豬與感覺豬之間, 跟Jody手牽手再走過幾個場景, 終於走出咗恐怖嘅喪屍鬼屋, 重見光明! Jody的手也徐徐的放開了…


===========================================
美劇迷請注意! 新一季《陰屍路 The Walking Dead》10月返黎喇!
《陰屍路The Walking Dead》 Season 6
FOX 頻道 (now TV CH.518)
10月12日起 逢星期一 9pm
美國同日播出

===========================================

到了另一個今年哈囉喂嘅重頭戲H15, 今年大玩感覺很邪門嘅「頭七」… 由於呢間鬼屋嘅參加者係要逐個逐個玩, 所以要預先登記, 冇得walk-in架! 小編同Jody當然有得玩啦! 不過要分開玩… 小編玩先, 跟Jody生離死別, 小編跟Jody說「我走先喇…」,隨即再哼多一句「♫玩遊時開心一點不必掛念我~♫」Jody笑了, 小編安心上路去, 先來影張車頭相, 然後入殮房自己訓上靈床, 由仵作綁到實一實, 想郁都郁唔到, 老老豆豆, 真係即刻認真mode, 諗下what if自己堅係咩咗, 應該是同一個情景… 然後就開始喪禮了, 自己的車頭相在靈堂上, OMG! 啋~ 然後就慢慢落地獄, 嗚呀~ 好多恐怖鬼呀~ 跟住,要上court! 是地府的court! 閻羅王:「你有罪! 判落18層地獄!」我:「Objection! 我都未知咩罪!」閻:「以胸襲警係死罪!」我:「我係男人,那有胸?」閻:「根據基本法,三權唔駛分立,我地位又超然,我講乜就乜!」我:「敢問閻生貴姓?」閻:「本官姓梁! 拉佢出去~」(當然, 呢幕是老作的, 而頭一句「你有罪! 判落18層地獄!」是真的, 都幾搞笑~ 閻生一臉認真, 但佢一日要講呢句對白幾百次) 就是咁, 小編就落咗地獄。但又其實, 地獄環境都幾好, 起碼唔駛幾球嘢供間劏房都仲要畀人鬧係廢青吖, 仲舒服過現實嘅香港, 原來住喺香港慘過住喺地獄~ 正當榴槤忘返之際, 已經送我來回地獄又折返人間… 典解我去完地獄嘅感覺同我去完日本返嚟嘅感覺一樣架?! 都係唔想返香港囉~ 正一廢青! 等咗一陣, Jody都玩完出來, 一臉驚慌, 我輕撫她的臉:「你OK嘛? 對不起剛才陪不到你!」Jody:「沒有你在,我也怕!」我:「別怕! 現在我不是在你身邊了嗎?」留意返, 突然用上書面語代表抒情文體。

(由於在H15入面是被綁實的, 因此冇得影相)

玩完H15, Jody表示是日驚嚇Quota用盡, 不能再承受驚嚇。那麼小編當然照顧有加, 不再讓Jody受驚, 就陪同佢遊玩另一個重點但又完全唔驚嚇嘅「多啦A夢哈囉喂影城」! 雖則Jody如此年輕, 但佢都係覺得叫叮噹親切得多! 一去到, Jody就被6位主角首度嘅哈囉喂造型所吸引, 小編變身娘娘御用攝影師, 係咁影影影! 除咗好靚嘅佈景之外, 仲有啲小學雞機關可以玩的! 其實間唔中小學雞下都好吖, 可能因為日日睇新聞都覺得啲高官講嘢連小學雞嘅程度都未有, 玩吓小學雞嘢立即感覺到一陣超然嘅優越感! 玩玩吓, Jody突然同小編講:「同我影張相吖~」小編:「咪影緊囉~」Jody:「唔係呀~ 你過嚟影吖~ 搵人揸機吖~」



叮噹都玩完, 天色已黑, Jody有點攰, 小編說:「其餘的鬼屋就下一次再玩吧! 包括日間裝飾細緻華麗, 夜間變身鬼屋嘅「甜心蘿莉大宅(日) / 血咒哥特古宅(夜)」、雲集過去14年多個精選哈囉喂場景嘅「十五年驚異回魂」、需要較大體力又唔可以著短裙玩因為要係咁爬爬爬嘅「生化突變大暴走(日) / 異種突襲大屠亡(夜)」同埋全港最長嘅室外萬聖節糖果遊樂場地「小南瓜糖果遊」等等...」Jody:「乜你背熟咗嘅? 你係海洋公關嗎? (海洋公園同公關嘅混合體) 好心急呢~ 幾時再嚟?」小編表示:「你想的話, 聽日就同你再嚟啦~」Jody甜說: 「真係架?!」


文 / 攝: 黑莓
Model: Jody 曾雨晴
衣裳協力: Jody 佢自己囉~ 陰公豬
related events

海洋公園哈囉喂 2015「哈囉喂全日祭」

2 - 30 Oct 2015 (every Fri) 10:30am (12hr 30min)

@ Ocean Park

海洋公園哈囉喂全日祭十五周年 為全城大小嘩鬼帶來最激體驗 過百萬份糖果禮物全日大放送 華麗大宅甜美少女與遊人大玩Selfie 充氣障礙賽締造嶄新鬼屋體驗 一眾「驚」典猛鬼升級回魂 為慶...

挪亞方舟「快樂夢想特工隊」

13 Jul - 1 Sep (every Sun, Sat) 10am (8hr)

@ 香港挪亞方舟

有邊位小朋友想打份「暑假工」? 放心,講緊嘅「暑假工」其實係挪亞方舟暑期特備活動「快樂夢想特工隊」,等小朋友可以初嘗「返工」滋味!挪亞方舟特別準備奇趣職業,畀小朋友探索...

海洋公園「哈囉喂全園祭」2019

4 - 11 Oct (every Fri) 10am (14hr)

@ Ocean Park

全城期待的海洋公園哈囉喂今年將以全新概念「哈囉喂全園祭」強勢歸來!惡鬼冤魂將佔據公園六大主題鬼域,恐怖元素由鬼屋內延伸至整個區域遍佈全園;節目驚嚇程度更由黃昏五時開始到...

萬聖節前夜

31 Oct (Thu)

@ globe

萬聖節(All Saints' Day, All Hallow's Day或Hallowmas)是每年11月1日的歐美大節日。Halloween 是 All Hallows Eve 的縮寫,萬聖節前夜的意思,指10月31日的晚上。 萬聖節其實不是基

more related events
last blog

十月份之啤酒嘉年華逐個捉

23 Sep 2015 (Wed) 3:37pm

十月向來是啤酒嘉年華或美酒派對的旺季,對於鍾情品酒的大家來說,可以每個週末都去感受一番外國風情的嘉年華、嚐一口手工啤,確是一件舒心的事!為了令大家不會錯過一連串啤酒嘉年...

next blog

玩樂停不了 [10月號]

29 Sep 2015 (Tue) 5:17pm

玩樂停不了 - 十月號 重點推介: 哈囉喂活動及啤酒嘉年華 踏入十月份,終於有些秋意感覺了, 是適合戶外活動的季節,而且也是Halloween及啤酒嘉年華的月份。以下是10月必去必玩的推介給大...

comments