Timable

毛记电视《劲曲金曲》幕后黑面 — 林日曦

作者: Timable, 2015年11月6日 (五) 下午3时19分


毛记电视《第一届十大劲曲金曲分奖典礼》,一场以为是Commercial赚后生仔钱的伊馆Show,背后原来要硬蚀一百万,毛记黑面脑细林日曦选择唔用一球炒工厦,坚持要搞蚀本Show。然后,找到Title Sponsor,不用蚀足一球, 此事Facebook上过万Likes(虽则林总讲句早晨都几千Likes),还有读者自愿奉上一万大元以作支持。老实说,笔者睇Show无数,从未试过由衷感谢赞助商(就算赞助商送飞),但今次会。若你问我,典解《黑纸》《100毛》《毛记电视》咁狠劲,我觉得唔是因为搞笑恶搞抽水或盘菜莹子,而是因为「颠覆性创新」,外语学名叫Disruptive Innovation。点颠法?找来林脑细讲两句。OK,SHELL We Talk? (赞助商You Win!) 喂!我访问紧你呀!黑少阵面得嘛? (BTW,访问完可否带我上楼上搵莹子合照?)


带来共同话题的网上电视台
大台先有电视台再有杂志,毛记调转,搞杂志搞到开电视台,为的是: 寻回人与人间有共同话题的年代。「以前大家共同话题多数系电视节目,例如张卫健口头禅,但宜家话题较分散,大家唔知大家讲咩,少咗大众共同话题。」林日曦觉得纵然毛记电视台未必可以做到大众化,但至少观众不会睇完扮冇睇。「最悲哀的不是香港电视节目质素差,而系好多人睇完要扮冇睇。渠地会话屋企人睇所以望到、甚至话自己唔觉意路过睇咗。原因?渠哋以睇无线为耻啰。」

林日曦上一次看TVB的剧集是《天地豪情》,那年是1998年。「20-30岁的年轻人已经好少会睇无线,渠哋懂得寻找自己兴趣,可能系追美剧/韩剧,但唔会想睇一啲无限Loop相同主题嘅电视剧。」那么,毛记电视应该是年轻人自己寻找的兴趣之一。

曲线唱出热话
《劲曲金曲》是毛记电视的皇牌节目,金榜歌曲都是一些二次创作。「想以改词方式,曲线表达想讲嘅事,不论是时政,还是娱圈事。」每星期一集的《劲曲金曲》,每次倒数10首歌,虽然每首只唱一部分,但改词的工作量应该也不轻,以为有专责作词的小队,原来也只有两位,而且内容总是紧贴热话。「主要系我同另一位同事一齐创作。快系重要嘅,试过已经完成十首歌,但又刚巧发生值得讲嘅事,于是又马上改一段,例如之前齐昕事件。」

事过廿四小时抽不得
一件事过了24小时便不可再抽,当真?「都只系一个讲法嚟。如果过咗24小时仍然想抽,就要諗一諗点样抽。好似之前FFX事件,有传媒搵咗真人现身说法,我哋咪搵原本嘅MV拍摄场地啰,模仿渠哋跳舞。」重点是如何用不一样的角度形容同一件事。

扭尽六壬变新桥
「扭桥」是林日曦在访问中提得最多的事,他认为创作路上要不断转变、加入新意念,但不可能走回头。「第一集《劲曲金曲》有打算请歌手唱,但唔成功,之后諗咗一轮,搵自己人扮返,效果原来又OK。到做咗六集,觉得要突破,又咁啱约到林雪,咪尝试一下啰。」总之,要不断扭,不断变。有没有歌手拒绝邀请?「每星期都有被拒绝。一般正常理由系无期。背后真正原因当然唔会知,但每人都有自己嘅考虑,可能有合约限制又可能觉得有啲社会性,唔适合自己形象。」


何韵诗主动「被迫」协办
今年毛记在何韵诗演唱会上举行了一场优秀选,题为「毛记电视主办,何韵诗被迫协办:《毛记电视劲曲金曲优秀选2015》」,但原来是由被迫协办的一方主动促成是次合作。「何韵诗今次演唱会嘅监制系昔日电台同事,而且阿诗平时应该都有留意毛记电视,有时都会帮手Share吓,所以渠哋就提出可以尝试合作。其实渠个show几特别,有好多香港人嘅参与,例如中学生组合、伞下爸妈,可能因为咁,渠哋觉得毛记可以做其中一part。」

林日曦笑称自己少有地不后悔答应合作,而且搞优秀选很配合他们强调「变」的原则。「今次觉得几好玩,我好少会应承合作之后冇后悔,因为好多嘢要烦,不过可能何韵诗渠哋会有后悔…因为决定合作之后,我哋强行由搞数榜变埋搞优秀选…仲作咗好多口号,例如「被迫协办」嗰啲。另一方面,其实搞优秀选都好符合我哋「变」嘅原则,于是成件事就慢慢建构出嚟。」

公平公正地造马
今次《十大劲曲金曲分奖典礼》的得奖名单闻说会有公众投票,不过就…「暂时机制未落实,但大致形式系会俾公众投票嘅,但就占0%,我嘅决定就占100%。我哋唔会理人讲咩,贯彻始终,公平公正咁造马~」

创作无尽头.扭得就扭
有人觉得创作灵感总有枯竭的时候,特别是每日都需要度大量桥,不过于林日曦个人而言,创作是无尽的,依然系嗰句 - 扭桥!「劲曲都仲有排扭,如果去到扭唔出,咪唔做劲曲或者毛记啰!咁都系一种扭,只不过系大方向地扭。但暂时未咁快出现,仲有好多方法可以令件事延续落去。」

艺人怕合作因为「讨厌政治」
毛记仿佛冲着大台而来,问到会否有压力来自大台,他认为没有多大,就算有压力,都是源于大家有点害怕。「其实冇咩压力系来自无线,如果有都可能系渠哋嘅Artist比较难约,但唔知系咪真系关事。反而压力可能系大家都有啲惊。(其实都冇咩好惊,我哋毛记好鬼爱国架嘛~)有时社会性些嘅内容,大家都怕合作,可能系客或者艺人,或者就系讨厌政治嘅一种。」

社会荒谬.衍生100毛
100毛/毛记的内容不少是讽刺社会,如果现况不是这样荒谬,还有100毛吗?「应该冇,可能做咗其他嘢,唔会系100毛/毛记。但宜家荒谬嘅事好多,唔单系发牌事件,即使有亚视存在多年,甚至以前出现过嘅佳视,但TVB依然可以创造出一样叫「惯性收视」嘅嘢。其实系一件灵异事件嚟,世界独一无二,解释唔到。如果冇依啲事,就冇毛记电视。」


毛记使命: 成为一扇吸引人打开的门
「毛记电视有冇社会使命?有!(虽然由自己把口讲有啲扮嘢,但不嬲都扮开嘅,唔紧要啦~)」很多人觉得受众不喜欢接收某些资讯,但林日曦认为可能是传媒用错传递方法。「举例讲,立法会Live系网上或电视都有得睇,条文议案又系一上网就搵到,但有几多人睇呢?所以毛记要做嘅就系引起大家兴趣。将值得留意但沉闷嘅事,用方法引起大家兴趣。毛记系无聊架,但就等如一道门,一道吸引嘅门可以令人想打开渠,去了解门后面嘅嘢。」其实门后面的东西一早已在,关键在于如何让人去留意,这亦是毛记的社会使命。

抽水背后.代价不少
有人认为类似100毛的抽水方式是在消费政治,抽完就算,又质疑他们有多少人曾修读/做政治,林日曦指现在社会是推广全民关心政治,不应该设任何限制。「如果只有读政治、做政治嘅人先可以论政治,咁个社会就玩完,亦都系对低学历人士嘅歧视。任何人都可以凭自己生活经验去有体验与诉求,从而作出评论。」

至于被指抽完就算,他认为这是引起大家兴趣的一种方式。「正如之前咁讲,所有料都一直喺度,但如果净系摆一样好核突嘅嘢出嚟话有营养叫大家食,渠哋都唔会食,所以要諗计吸引渠哋。Work唔Work冇人知,但如果每十万人有两个人因为我哋而尝试自己了解多少少件事,咁已经好好。」

抽水其实除了呃Like,背后还付出了很多大家看不到的代价。「前排Facebook有好多人转彩虹头像以示支持唔同性取向嘅人,唔少外国大品牌如Coca-Cola都有转。有人话渠咃抽水,但自身经验话我知唔可以咁话人!」原来100毛都试过因为一个支持同性恋的封面而被广告商抽起广告。「有一期100毛出了以《100毛系撑基佬 ,吹咩!》为题嘅封面(封面照系黄耀明+何韵诗),事后同事反映有品牌大老细话唔钟意,以后都唔落广告喇。」不过渠哋一于少理,往后封面依然有明哥呀诗,继续撑《一点粉红》。

他想说的是…抽水其实不是眼看的轻松,一句抽水的说话已经代表你付上了一些代价。「有啲歌手你以为渠post一句敢言系呃like,其实渠同时已经失去咗啲嘢,可能系返大陆登台唱歌嘅钱。大家唔够了解先会批评人只系抽水,冇諗到背后代价。」近几日有关黄秋生和明哥「伞后无Job」的报导已印证了这一点。


100毛.大家都想打的工
从网上平台所见,不少人都认为100毛的工作有趣又好玩,是年轻人的Dream Job,不过100毛又不时请人,莫非有什么秘密原因?「两大原因: 一,我哋仍然扩展中,需要人手。二,有同事觉得辛苦,顶唔住,所以走。」觉得辛苦主要系因为唔够癫。「入嚟做系因为渠哋钟意100毛嘅嘢,咁你做啲嘢系要自己同人哋都钟意先得。唔系平时睇完笑3秒就算,系要不断写稿,再自己ban同俾人ban,所以唔够癫系会觉得辛苦。」

不过林日曦都坦然另一个原因可能是新入职员工薪金不够高。「100毛仍然属于小本经营,相对于其他大传媒机构而言,我哋人工冇咁高,Fresh-Grad当然想人工多啲,如果喺度做得辛苦,人工又唔系最高,冇理由唔走,除非你好钟意依度。但要入到嚟先知系咪真系钟意,外面啲人觉得正系因为渠哋冇付出(时间及较低人工),所以先好想入嚟。不过愿意付出,人工唔会一直都系低嘅。」

当年苹果日报引入狗仔队文化,报纸排版五颜六色,行家及大众在骂肤浅市井,现在那份报纸不是这个Style?如今,网上世界,话题、用字、抽水方式/风格,都在跟100毛/毛记,我看见下一个壹传媒的诞生。最后,让我写一封「致林溢欣…吖唔系,系林日曦的公开信」:Dear 林总,我要总选2张。(会俾钱,唔是R免费) 谢!

编言按:
伸延阅读 真.哈佛 学术文章
What Is Disruptive Innovation?
http://hbr.org/2015/12/what-is-disruptive-innovation


文/编: Phoebe Cheung / 黑莓
相关事件

毛记电视《第一届十大劲曲金曲分奖典礼》

2016年1月11日 (一) 下午8时 (3小时)

@ 伊利沙伯体育馆 表演场

毛记电视强行主办,Shell Bonus咭冠名加油: 0竞争,0黑幕,0公信力! 一晚分发超过三千个奖项! 人类史上最大张乐坛成绩表! 毛记电视第一届十大劲曲金曲分奖典礼 一月十一 真.伊馆 分奖...

陈奕迅 "Fear and Dreams" 演唱会 2019 香港站

12月9日-12日 下午8时15分 (3小时)

@ 香港体育馆 (红馆)

Update 12/9/2019: 公布加开最后5场 Update 4/9/2019: 公布加开5场,共20场58,000张门票一次过公开发售 Update 22/8/2019: 消息指将加开27/12,29/12~1/1 5场,共20场一次过公

张敬轩X香港中乐团《盛乐》演唱会 2019

11月22日-24日 下午8时15分 (3小时)

@ 香港体育馆 (红馆)

DiDaBomBaJiZa银芽 指间挥洒弹拨 Update 4/9/2019: 公布详情喇! Update 18/1/2019: Confirm 11月开红馆,同中乐团合作 Update 28/12/2018:

"Playa La Fiesta" 海边音乐派对 @赤柱广场

11月3日 (日) 下午3时 (3小时)

@ 赤柱广场 天幕广场

赤柱广场于今个秋夏为大家带来「Playa La Fiesta海边音乐派对」! 7月至11月期间,每月的第一个星期日于赤柱广场将会有不同本地歌手及乐手的精彩表演,打头阵有香港人气乐队 — RubberBand、女...

更多相关事件
上一篇博文

香港红叶热点推介

2015年11月2日 (一) 下午6时10分

十一月天气开始转凉,终于感觉到淡淡的秋意。除了人人都爱的大闸蟹,马上联想到的当然是红叶啦!不少港人会在年尾去日本或者韩国外游赏枫,感受香港难有的秋季气息。虽然外国「枫景...

下一篇博文

十个为甚么典解一定要去Clockenflap

2015年11月9日 (一) 下午7时22分

有冇听过 / 有冇去过Clockenflap? 旧年有成4万几人去Clockenflap,如果你冇去过,Well~都有可能嘅~话晒香港有成七百几万人。但系,你睇完呢篇文,今年就真系冇可能唔去,典解? 睇完咪知十个为甚么典解...

留言