Timable

[率先試玩] Kitty Intelligence beta展覽

作者: Timable, 2011年8月7日 (日) 下午8時46分

黑莓見鄉講正苦話派o個6千蚊遲遲都未到手,就唯有頻頻接Timable o既Job (接近最低工資). 當接過隻job到手時, 黑莓同Timable渣Fit人講: 喂! 派錯Job呀你! 呢隻貓上次咪做左囉! 派下訪問劉心悠o個d筍Job俾我好喎! 可惜渣Fit人搞著gag回應: 貓唔怕舊,最緊要受! 做多次啦你!
黑莓睇清楚d,ye…係喎,的確唔係上次隻水晶貓Job,有冇咁多貓呀?! 好想即唱返句: 我的字典裡沒有Kitty,我好想殺死你~
不過,見唐英年就快做特首,香港快將淪陷,黑莓唯有搵得幾多得幾多,Hello Kitty,怕你冇咀麼?! 我做!

講就講得型,要我自己去採訪隻貓,就等如要我去採訪關菊英一樣,即係講不出聲…所以,小記立即zebra,搵左Kitty貓超級fans橙小姐來幫手,仲帶埋佢個御用攝影師, 黑莓連相都唔駛影,齋同PR吹水,爽乎? 其實一點都不爽.像我這一種男人要了解呢隻貓,難過要我理解美債與全球經濟關係好多...

大門口o既巨型Robot K!

講返正經野,呢個Kitty展覽已經係第3年o係香港搞. 而講正確d, 其實並唔係Kitty展,而係Sanrio展,只不過佢最紅,就當左係佢Solo show咁,但當然Kitty貓都的確係成個Show o既主角. 成個主題叫做Kitty Intelligence beta,而成個展館就叫做Sanrio Robotics Institute. 原來個展覽,並唔係齋睇同俾d 港女影V字手勢相再火速上載fb,亦唔係齋用黎check in同tag返自己男友,而係好有故事性,仲有遊戲玩添~

唔好咁心急,o係度慢慢聽埋briefing先開始玩啦~

解構Robot K!

入場人士原來要角色扮演做工程師,幫手o係研究生產Kitty貓機械人Robot K(咁佢同叮噹friend唔friend?) o既實驗室入面行晒7個Departments,完成任務就可以儲分換禮物. 至於換咩禮物,就係換配件比工程師們手上的Robot K並將之強化! (好勁的中文grammar) 要注意喔,入場時係要買200幾蚊o個隻門票先有得拎隻Robot K同埋玩遊戲. 如果係100蚊o個種標準門票就只可遠觀,不可褻玩了! 港男們要注意喇! 如果你買左冇Robot K o既飛,睇下你女友仲會唔會tag你…

隻Robot K咁cute,點捨得唔要呀?!

而且隻Robot K仲會同而家d 真寵物一樣,身入面裝有晶片,每玩1個game前都要o係全場15個passport位之一用隻Robot K 如8達通般o都一o都拎張pass先,而玩game前都要再o都一o都來check in儲分,又幾勁喎! 黑莓冇諗過星期6黎採訪Kitty展係要帶個腦來思考的,如此新奇,有埋橙小姐解釋俾我知,我以後就叫佢做新奇事橙...(OK爛嘛?)

D環境係咪好有電影感呢?!

咁o個7個部門o既任務係咩呢, 黑莓唔會o係度講晒,留返d神秘感比大家自己去探索! 不過,每個部門o既佈置都十分靚同精細,實在冇唸過o係個商場o既臨時show可以佈置得咁好. 好多detail位,都盡顯左唔同Sanrio角色o既性格,而且好有故事性,難怪橙小姐同PR小姐異口同聲話: 今年比往年的精細得多了! 不過,如果冇公關部專業帶隊講解o既素人朋友們,可能就要再用多d 眼力同心機,先至會發現到d精妙之處喇.

做咩射Kitty???? 哦~ 唔係射佢,係幫佢上螺絲o者~

D裝飾靚到呢~

除左玩game,當然不少喪影相位. 據說今年o既影相位比過去的又多左. 不過大家o係喪影o既同時,唔好唔知原來o係當日o既指定時間內Check out(即係玩完走人),又可以得到冇得賣o既清潔布一塊,用黎抹下你隻心愛o既Robot K. 所以,你想喪影900張相po上fb定係想拎塊別注清潔布,就要唸清楚了! 不過最簡單o既方法就係玩多次,因為手執Robot K的話,再入場就可以買100蚊o個隻飛而有得玩埋game儲分! 咁就可以一次唔理時間喪影,一次就快快玩完game儲分即閃拎塊布啦! 負責俾$的男友們係咪憎我呢?!

Robot K都病病了...

咁就要幫佢地急救下喇~ kaka~ XD

縱然小記對Sanrio一系列的卡通角色零興趣,都不得不讚日本人的創意,精細同認真,佢地真係會將每一樣野做到最好. 而有某些位,冷酷如我都會Git一聲笑鳥… 真係唔讚佢cuite都唔得. 當然,生意頭腦亦係日本人的強項之一. 如果你想將你隻Robot K強化到像Transformer咁勁,你就要好多配件,即係要好高分同埋玩好多轉先得喇! 就算你放棄強化,近出口位的高科技合成影相區(要影就記得唔好著綠色衫)同埋紀念品售賣部都會鋸到你(個男朋友)一頸血...男士們小心大出血! 不過日元創新高,o係呢度出血,似乎好過要去日本出血. 去日本o個隻叫賣血,o係呢度小小地都只係叫捐下血咁o者~

=====後記=====

1/ 有睇過無記d 劇集o既粉絲都知,d 劇連罐可樂都要遮logo或者用罐假可樂,所以有時劇情需要講Hello Kitty時都會懶係食字懶係cutie咁講成Hello Mimi. 不過呢,原來呢, Hello Mimi係真有其貓的,仲要係Hello Kitty個穿屎細妹囉...原來只係我的字典裡沒有Mimi...

2/ 黑莓今次唔駛影相,相對地得閒,就R野同PR小姐傾下計. 我提議,不如谷下自由行宣傳,等佢地包團落黎睇,一定賺多好多$! (小記上個月睇黃子華舞台劇都遇見好多自由行,好恐怖...) 不過大家o係世博之後都深明自由行o既破壞能力比起布殊仔o係伊拉克最終都搵唔到o既大殺傷力武器更強! 所有經過佢地手o既野,都會分解成粒子o既狀態,俗d講就係渣都冇得淨. 不過,反正個show唔會周圍巡迴(有d似五月天o既香港限定Just Rock it!咁),d野爛左,收多左入場費,在商言商都有賺. 不過,唔好忘記我們偉大的祖國仲有另一樣超級國粹 – 山寨! 倘若某位老闆級自由人陪佢那位全身LB的妙齡2奶落黎行Kitty展,見到商機無限,馬上將Kitty展山寨了,到時全國都係山寨貓展,日本仔就得不償失了! (不過黑莓覺得山寨版Kitty展應該仲好睇! 一定好爆笑=p)

3/ 冇Dear Daniel o既? 佢地分左手喇?

到最後有得同Sanrio家族同照呀~ (乜原來Miffy唔係佢地d friend黎嫁咩???)

Timable特約記者: 黑莓
女模: Orange
攝影: PS So
超級鳴謝Orange同PS So仗義相助~
06/08/2011
相關事件

Kitty Intelligence beta展覽 @愉景新城

2011年8月11日-12日 上午11時 (10小時)

@ D‧PARK 愉景新城

Kitty展今年首度移師荃灣愉景新城舉行,整個設計更是首度由​日本Sanrio創意總監親自監修,粉絲們可以闖入全城最大的迷​宮布局的Sanrio Robot Institute(S.R.I.)高科技學院,接受7個部門的培...

「動漫狂賞曲」大型綜合動漫主題展

8月9日-18日 上午11時 (9小時)

@ D2 Place ONE 2/F The Space

今個盛夏,頑童族與動漫代理商木棉花及本地手作平台CRECRA攜手合作,於8月9日至18日在荔枝角D2 Place舉行全港首個大型綜合動漫主題展-「動漫狂賞曲」。屆時將一次呈現八大日本人氣動漫場...

"MIKU EXPO Digital Stars" 音樂會 2019 香港站

7月26日 (五) 下午7時 (4小時)

@ TTN This Town Needs

為了讓粉絲在享受演唱會之餘,提供另一個讓大家聚集分享彼此喜愛MIKU心情的一場活動,初音未來相關國內外音樂家與DJ將聚集在一起帶來精彩演出。“MIKU EXPO Digital Stars 2019 ”希望可以將不...

水樹奈奈 "Live Express 2019+" 巡迴演唱會 2019 香港站

10月26日 (六) 下午7時45分 (3小時15分鐘)

@ 九龍灣國際展貿中心 匯星

Live Nation隆重宣佈,亞洲最賣座動漫聲優、被譽為「人生中無論如何都想看一次現場演出」的日本藝人水樹奈奈,出道多年終於登陸香港舉行首次演唱會! 「NANA MIZUKI LIVE EXPRESS 2019+ HONG KONG」...

更多相關事件
上一篇網誌

巴克萊亞洲錦標賽 決賽: 阿士東維拉 vs 車路士

2011年7月31日 (日) 上午2時31分

就咁,繼Hello Kitty同Fiona Sit我係唔識之後,波,我都係唔識的! 不過,見咁大隊車路士飛到過黎香港,仲要係對返英超,唔駛我飛過去英國睇,作為Event達人,冇奶油唔到下啦! 相就照影啦,講就唔識講嫁喇,...

下一篇網誌

[全紀錄] Suede The Greatest Hits Tour Live in Hong Kong 2011

2011年8月13日 (六) 下午5時52分

繼一連串Kitty貓同Fiona o既Job之後,終於有隻Job係黑莓滿心期待的,仲要係超級期待o個隻,就係Suede Live in Hong Kong 2011!!! 話說黑莓生於香港典型公屋家庭,聽4大天王長大,細個時唔知咩叫英文歌.直至...

留言